9న ఓటిటిలోకి యశోద చిత్రం

డిసెంబర్ 06 (ఆంధ్రపత్రిక): టాలీవుడ్‌ టాప్‌ హీరోయిన్‌ సమంత నటించిన తాజా చిత్రం ’యశోద’. అద్దె గర్భం అనే విభిన్న కథాంశంతో తెరకెక్కిన ఈ చిత్రం.. నవంబర్‌ 11న తెలుగుతోపాటు తమిళం, కన్నడ, మలయాళం, హిందీ భాషల్లో విడుదలైన ఈ చిత్రం సూపర్‌ హిట్‌గా నిలిచింది. హరి`హరీష్‌ దర్శకత్వం వహించిన ఈ మూవీ దాదాపు రూ.30 కోట్లకు పైగా కలెక్షన్లని రాబట్టి సత్తా చాటింది. ముఖ్యంగా ఈ సినిమాలో సమంత నటనకు అభిమానులతో పాటు విమర్శకుల నుంచి సైతం ప్రశంసలు దక్కాయి. అయితే.. థియేటర్స్‌లో ఈ సినిమాని చూడలేకపోయిన ఎంతోమంది సినీ లవర్స్‌ ఈ చిత్ర ఓటీటీ విడుదల గురించి ఎంతో ఆసక్తితో ఎదురు చూస్తున్నారు. నిజానికి ఈ చిత్రం ఇప్పటికే ఓటీటీలోకి రావాల్సింది. కానీ ’ఈవా’ హాస్పిటల్స్‌ కేసు వేయడంతో విడుదలని నిలిపి వేశారు. తాజాగా దీనికి సంబంధించిన వివాదం సద్దు మణిగింది. దీంతో ఈ చిత్ర ఓటీటీ స్ట్రీమింగ్‌ ఉన్న అడ్డు తొలగింది. దాంతో ఈ నెల 9న ఈ మూవీ అమెజాన్‌ ప్రైమ్‌లో స్టీమ్రింగ్‌ కానున్నట్లు వార్తలు వినిపిస్తున్నాయి. దీనిపై త్వరలోనే ఆ ఓటీటీ యాజమాన్యం నుంచి అధికారిక ప్రకటన రానుంది. కాగా.. మయోసైటిస్‌ అనే అరుదైన వ్యాధితో బాధపడుతూనే ఈ చిత్రానికి సమంత డబ్బింగ్‌ కంప్లీట్‌ చేయడం విశేషం.