హత్యానేరంపై గిరిజనుడి అరెస్టు

అరకులోయ, నవంబర్‌ 3, (ఆంధ్రపత్రిక) : మానభంగం, హత్యానేరంపై ఓ గిరిజనుడిని అరెస్టు చేసినట్టు అరకులోయ పోలీసు సర్కిల్‌ ఇన్‌స్పెక్టర్‌ జి.దేముడుబాబు తెలిపారు. స్థానిక పోలీసు సర్కిల్‌ ఇన్‌స్పెక్టర్‌ కార్యాలయంలో గురువారం ఏర్పాటుచేసిన విలేకరుల సమావేశంలో ఆయన మాట్లాడారు. తమ సర్కిల్‌ పరిధిలోని నందివలస గ్రామానికి చెందిన గెమ్మెలి సావిత్రి అనే గిరిజన యువతిపై ఇదే గ్రామానికి చెందిన జన్ని రామచంద్ర అనే గిరిజనుడు అత్యాచారానికి పాల్పడి దారుణంగా చంపేశాడని ఆయన తెలిపారు. నిందితుడికి భార్య ఉన్నప్పటికీ పరాయి యువతి సావిత్రిపై మోజుపడి నిత్యం వేధించేవాడని దర్యాప్తులో తేలిందని ఆయన చెప్పారు. గత నెల 29వ తేదీన ఈ అఘాయిత్యానికి గిరిజనుడు పాల్పడి గుట్టుచప్పుడు కాకుండా విషయాన్ని దాచిపెట్టి ఏమీ తెలియనట్టు వ్యవహరించేవాడని, అయితే కన్న కూతురు కనిపించకపోవడంతో జన్ని రామచంద్రపై అనుమానించిన మృతురాలి తండ్రి డుంబ్రిగుడ పోలీసులకు ఫిర్యాదు చేశారని ఆయన తెలిపారు. దీంతో తమదైన శైలిలో అన్ని కోణాల్లో సమగ్రంగా విచారించి నిందితుడ్ని అదుపులోకి తీసుకున్నామన్నారు. భార్య ఉండగానే గెమ్మెలి సావిత్రిని రెండో భార్యగా పెళ్లి చేసుకునేందుకు రామచంద్ర ముందుకు వచ్చాడని, పెళ్లికి యువతి అభ్యంతరం తెలపడంతో మద్యం మత్తులో ఉన్న ఈ కామాంధుడు సావిత్రిని మానభంగం చేసి ఆ పిదప హత్యచేసినట్టు ఆయన తెలిపారు. ఈ కేసును చేధించడంలో డుంబ్రిగుడ, అరకులోయ పోలీస్‌ సబ్‌ ఇన్‌స్పెక్టర్‌లు సంతోష్‌, సంతోష్‌కుమార్‌, పోలీసు సిబ్బంది చురుకైన పాత్ర పోషించినట్టు సిఐ జి.దేముడుబాబు వెల్లడిరచారు.