ఆయన ఏం చేసినా సెన్సేషన్‌ అన్నట్టుగా ఉండేది మేటర్‌. ఒకరకంగా రాయలసీమ రాజకీయాల్లో ఆయనది ఓ చరిత్రేనని చెప్పొచ్చు. అందుకే, తెలుగు రాష్ట్రాల్లో ఆయన పేరు తెలియనివారు ఉండరంటే అతిశయోక్తి కాదు. దాదాపు యాభై ఏళ్ల రాజకీయం చేసి.. తాడిపత్రి సెంటర్‌గా అనంతపురం జిల్లా రాజకీయాల్ని శాసించిన జేసీ జీవితం ఇప్పుడు వాళ్ల చేతుల్లోకి వెళ్లబోతోందనే ప్రచారం… పొలిటికల్‌గా ఆసక్తి రేపుతోంది.

ఆయన పేల్చేవన్నీ పొలిటికల్‌ డైనమైట్లే!

ఉద్యమసమయంలో అయినా.. రాష్ట్ర విభజన తర్వాతైనా.. ఆయన పేల్చిన డైలాగ్‌ డైనమైట్లు రాజకీయంగా ఎన్నో చర్చలకు కారణమయ్యాయి. అందుకే పాలిటిక్స్‌లో ఆయనెప్పుడూ ప్రత్యేకం. అనంతపురం జిల్లా రాజకీయాల్లో తనకంటూ ఓ ముద్ర వేసుకున్న జేసీ… తెలుగు రాష్ట్రాల్లో పరిచయం అక్కర్లేని రాజకీయ నేతగా ఎదిగారు. అయితే, ఆయన జీవితంలో వివాదాస్పద అంశాలకు కొదవలేదు. ప్రధానంగా పరిటాల రవి హత్యకుట్రలో జెసి దివాకర్ రెడ్డి ప్రమేయం ఉందంటూ వచ్చిన ఆరోపణలు.. అప్పట్లో సంచలనం రేపాయి. విచారణలో జెసి దివాకర్ రెడ్డికి క్లీన్ చిట్ అయితే వచ్చింది. అంతేకాదు, పరిటాల రవి జీవితకథగా తెరకెక్కిన రక్తచరిత్ర లోనూ… ఎక్కడా జెసి ఫ్యామిలీకి సంబంధించిన అంశాలు చూపించలేదు.

పరిటాలతో వైరం, వైఎస్‌తో సంబంధాలు, విభేదాలు

అయితే, తాజాగా జెసి దివాకర్ రెడ్డి బయోపిక్ తీయబోతున్నట్లు ప్రచారం జరుగుతుండటంతో.. అందులో ఏం చెప్పబోతున్నారు? ఏం చూపించబోతున్నారు? అనే ఆసక్తి ఏర్పడింది. ఈ బయోపిక్‌లో అన్నీ వాస్తవాలే ఉంటాయా??? అనే చర్చ మొదలైంది. ఎందుకంటే రాయలసీమ రాజకీయాల్లో జేసీ పాత్ర తక్కువేమీ కాదు. పరిటాల కుటుంబంతో వైరం.. వైయస్ ఫ్యామిలీతో ఉన్న సంబంధాలు, విభేదాలు… ఇలా చాలా అంశాలు స్పృశించాల్సి ఉంటుంది. మరవన్నీ బయోపిక్‌లో ఉంటాయా? అన్నదే చర్చనీయాంశంగా మారింది. సీమలో ఎంత పేరున్న నాయకుడో.. అంతే వివాదాస్పదుడు జేసీ దివాకర్‌రెడ్డి. అలాంటి నాయకుడిపై అంటే.. ఆమాత్రం క్యూరియాసిటీ ఉంటుందంటున్నారు విశ్లేషకులు.

జేసీ బయోపిక్‌పై గ్రౌండ్‌ వర్క్‌ మొదలైందా?

దివాకర్ రెడ్డి బయోపిక్ కోసం ఇప్పటికే గ్రౌండ్ వర్క్ ప్రారంభమైనట్లు తెలుస్తోంది. జేసి కుటుంబాన్ని కలిసి… అన్ని అంశాలు చర్చించేందుకు ఓ ప్రముఖ డైరెక్టర్‌ సన్నద్ధం అవుతున్నట్లు తెలుస్తోంది. అన్నీ ఓకే.. మరి జేసీ దివాకర్‌రెడ్డి క్యారెక్టర్‌ను ఎవరు పోషించబోతున్నారనేది కూడా పెద్ద విషయమే కాబోతోంది. అయితే, ఈ అంశంలో క్లారిటీ వచ్చినట్టు తెలుస్తోంది. దివాకర్‌రెడ్డి పాత్రను నటకిరీటి రాజేంద్రప్రసాద్ పోషిస్తున్నారనే ముచ్చట బలంగా వినిపిస్తోంది. రాజేంద్రప్రసాద్‌కు, జేసి దివాకర్ రెడ్డికి దగ్గర పోలికలు ఉన్నందున… ఆయననే ఖాయం చేసినట్టు తెలుస్తోంది. ఇటీవల తన కూమార్తె మరణించినప్పడు.. విగ్గులేకుండా, బట్ట తలతో కనిపించిన రాజేంద్రప్రసాద్‌ను చూసి.. అచ్చం జెసి దివాకర్ రెడ్డి లాగే ఉన్నారన్న మాట కూడా బాగానే వినిపించింది.

పరిటాల కుటుంబ ప్రస్తావన జేసీ లో తీసుకొస్తారా?

మరి జేసీ విజయాలు, అనుకూల అంశాలే ఈ లో ఉంటాయా? వివాదాస్పదమైన విషయాలూ ఉంటాయా? అన్నది తెలియాల్సి ఉంది. జిల్లా రాజకీయాలకు సంబంధించిన అంశాలు చూపించాల్సి వస్తే… కచ్చితంగా పరిటాల కుటుంబంతో జేసీ వైరం కూడా ఉంటుంది. రక్త చరిత్ర లో జేసీ ప్రస్తావన లేదు కాబట్టి ..జేసి బయోపిక్ లో కూడా పరిటాల ప్రస్తావన ఉండకపోవచ్చని తెలుస్తోంది. సరదా ముచ్చట్లు… ముక్కుసూటి మాటలు… తప్పనిపిస్తే ఎంతటివారినైనా ఉతికారేయడం… ఇలా జేసీ అంటేనే మంటుటెండలో ఏసీ అన్నట్టుగా ఉంటుంది వ్యవహారం. అలాంటి నాయకుడి బయోపిక్‌ అంటే.. ఆ క్రేజ్ మామూలుగా ఉంటుందా. చూడాలి మరి, ఎలా ఉంటుందో!.