దాఖలైన పిటిషిన్‌ను కొట్టివేసిన సుప్రీంకోర్టు
న్యూఢల్లీి,డిసెంబర్‌ 9 (ఆధ్రపత్రిక) : న్యాయ మూర్తుల నియామకాలపై కొలీజియం సమావేశాల్లోని చర్చల వివరాలను వెల్లడిరచాలంటూ దాఖలైన పిటిషిన్‌ను సుప్రీంకోర్టు కొట్టివేసింది.ఆ వివరాలను బహిర్గతం చేయలేమని పేర్కొంది. ‘’అక్కడ (కొలీజియం సమావేశంలో) ఏం చర్చంచుకున్నా.. వాటిని బహిర్గతం చేయలేం. కేవలం ఆ సమావేశం తుది నిర్ణయాన్ని మాత్రమే వెల్లడిస్తాం’’ అని సుప్రీంకోర్టు స్పష్టం చేసింది. నాటి సమావేశంలో పాల్గొన్న ఓ న్యాయమూర్తి ఇచ్చిన ఇంటర్వ్యూ ఆధారంగా వెలువడ్డ కథనాలపై పిటిషనర్‌ ఆధారపడ్డారని కోర్టు పేర్కొంది. తాము ఈ ఆంశంపై మరోసారి వ్యాఖ్యానించదల్చుకోలేదని.. ఈ పిటిషన్‌లో పసలేదని తెలిపింది. దీనిని కొట్టివేస్తున్నట్లు ప్రకటించింది.ఇద్దరు న్యాయమూర్తుల నియామకం కోసం 2018 డిసెంబర్‌ 12వ తేదీన జరిగిన కొలీజియం సమావేశంలో వివరాలను వెల్లడిరచాలని కోరుతూ సామాజిక కార్యకర్త అంజలీ భరద్వాజ్‌ కోర్టును ఆశ్రయించారు. ఆమె తొలుత ఆర్‌టీఐ చట్టం కింద ఈ వివరాలు కోరగా.. సంబంధిత అధికారులు ఇచ్చేందుకు నిరాకరించారు. దీంతో ఆ నిర్ణయాన్ని సవాలు చేస్తూ ఆమె న్యాయస్థానంలో పిటిషన్‌ దాఖలు చేశారు. 2018 డిసెంబర్‌ 12వ తేదీ నాటి కొలీజియం సమావేశంలో సీజేఐ రంజన్‌ గొగోయ్‌, జస్టిస్‌ మదన్‌ బి లోకూర్‌, జస్టిస్‌ ఏకే సిక్రీ, జస్టిస్‌ ఎస్‌ఏ బోబ్డే, జస్టిస్‌ ఎన్వీ రమణ పాల్గొన్నారు. కానీ, అప్పట్లో ఈ భేటీ వివరాలను సుప్రీం కోర్టు వెబ్‌సైట్‌లో అప్‌లోడ్‌ చేయలేదు. ఆ తర్వాత 2019లో ఆ భేటీ వివరాలను వెబ్‌సైట్‌లో ఉంచకపోవడంపై జస్టిస్‌ లోకూర్‌ అసంతృప్తి వ్యక్తం చేశారు.
