సామజవరగమనతో వస్తోన్న శ్రీవిష్ణు

ఫలితం ఎలా ఉన్నా కంటెంట్‌ ఉన్న కథలను ఎంచుకోవడంలో శ్రీవిష్ణు ముందు వరుసలో ఉంటాడు. జయాపజాయలతో సంబంధంలేకుండా ప్రేక్షకులకు కొత్త తరహా కథలను పరిచయం చేస్తుంటాడు. కెరీర్‌ మొదటి నుండి శ్రీవిష్ణు విభిన్న జానర్లో సినిమాలను చేస్తూ ప్రేక్షకులలో ప్రత్యేక గుర్తింపు తెచ్చుకున్నాడు. కాగా గతేడాది ఆయన నటించిన ’అల్లూరి’ విడుదలై పాజిటీవ్‌ టాక్‌ తెచ్చుకుంది. కానీ కమర్షియల్‌ సక్సెస్‌ సాధించలేకపోయింది. ప్రస్తుతం శ్రీవిష్ణు ’వివాహా భోజనంబు’ ఫేమ్‌ రామ్‌ అబ్బరాజుతో సామజవరగమన అనే సినిమా చేస్తున్నాడు. ప్రస్తుతం ఈ సినిమా షూటింగ్‌ చివరి దశలో ఉంది. తాజాగా మేకర్స్‌ ఈ సినిమా టీజర్‌ను రిలీజ్‌ చేశారు. గ్లింప్స్‌తోనే మేకర్స్‌ సినిమా ఎలా ఉంటుందో కాస్త క్లారిటీ ఇచ్చే ప్రయత్నం చేశారు. ప్రేమించి పెళ్లి చేసుకునే వాళ్లకి పలు ప్రాబ్లమ్స్‌ ఉంటాయన్న మాట వాస్తవం. కానీ ఈ సినిమాలో మాత్రం శ్రీవిష్ణు ఎవ్వరికి లేని వింత ప్రాబ్లమ్‌ ఫేస్‌ చేస్తున్నట్లు తెలుస్తుంది. మరీ ఆ వింత ప్రాబ్లమ్‌ ఎంటో తెలియాలంటే సినిమా వచ్చే వరకు వేచి చూడాల్సిందే. అగ్ర నిర్మాణ సంస్థ ఏకే ఎంటర్‌టైనమెంట్స్‌ బ్యానర్‌ రూపొందించిన సినిమా కావడంతో క్వాలిటీ విషయంలో రాజీ పడినట్లు కనిపించలేదు. ఫస్ట్‌ ప్రేమ్‌ నుండి లాస్ట్‌ ఫ్రేమ్‌ వరకు గ్లింప్స్‌ చాలా రిచ్‌గా కనిపించింది. గోపి సుందర్‌ మ్యూజిక్‌ కూడా ఫ్రెష్‌గా ఉంది. ఇక గ్లింప్స్‌లో ప్రేమించి పెళ్లి చేసుకునే వాళ్లకి కాస్ట్‌ ప్రాబ్లమ్‌ వస్తుంది లేదా క్యాష్‌ ప్రాబ్లమ్‌ వస్తుంది. కానీ నాకేంట్రా ఎవరకీ రాని వింత ప్రాబ్లమ్‌ వచ్చింది అంటూ శ్రీవిష్ణు చెప్పే డైలాగ్స్‌ ఆకట్టుకుంటున్నాయి. అవుట్‌ అండ్‌ అవుట్‌ కామెడీ ఎంటర్‌టైనర్‌గా తెరకెక్కుతున్న ఈ సినిమాలో విష్ణుకు జోడీగా బిగిల్‌ ఫేమ్‌ రెబా మోనికా జాన్‌ నటిస్తుంది. హాస్య మూవీస్‌ బ్యానర్‌పై రాజేష్‌ దండ ఈ సినిమాను నిర్మిస్తున్నాడు. గోపి సుందర్‌ స్వరకల్పనలో రూపొందుతున్న ఈ సినిమా వేసవిలో హాస్యపు విందులు వడ్డించడానికి ముస్తాబువుతుంది.