- దుర్గమ్మ సేవలో సీఎం
- అమ్మవారికి పట్టువస్త్రాలు, పసుపు, కుంకుమ సమర్పించిన ముఖ్యమంత్రి వై.ఎస్‌ జగన్మోహన్‌ రెడ్డి
- సంప్రదాయ వస్త్రధారణలో వచ్చిన సీఎం
- పూర్ణకుంభంతో స్వాగతం పలికిన వేదపండితులు
- పట్టువస్త్రాలు, పసుపు, కుంకుమలను తలపై పెట్టుకుని ఆలయంలోకి వెళ్లి శ్రీసరస్వతీ దేవి
- అలంకారంలో దర్శనమిస్తున్న అమ్మ వారి పేరున సమర్పించిన సీఎం
ఇంద్రకీలాద్రి,అక్టోబర్‌ 2(ఆంధ్రపత్రిక): విజయవాడలోని ఇంద్రకీలాద్రిపై దసరా శరన్నవరాత్రి ఉత్సవాల్లో ముఖ్యమంత్రి వై.ఎస్‌జగన్మోహన్‌ రెడ్డి ఆదివారం పాల్గొన్నారు. అత్యంత ప్రాశస్త్యమైన మూలా నక్షత్రం రోజున శ్రీసరస్వతీదేవి అలంకరణలో ఉన్న కనకదుర్గమ్మను దర్శించుకున్నారు. రాష్ట్ర ప్రభుత్వం తరఫున పట్టు వస్త్రాలు, పసుపు, కుంకుమ సమర్పించారు. ఆదివారం మధ్యాహ్నం 3 గంటలకు ఆహ్లాదకర వాతావరణం మధ్య తన క్యాంప్‌ కార్యాలయం నుంచి బయలుదేరి ఇంద్రకీలాద్రి చేరుకున్నారు. సంప్రదాయ వస్త్రధారణలో వచ్చిన ముఖ్యమంత్రి వై.ఎస్‌ జగన్మోహన్‌ రెడ్డికి ఆలయం వద్ద వేద పండితులు పూర్ణకుంభంతో స్వాగతం పలికారు. ఆలయ స్థానాచార్యులు విష్ణు బట్ల శివప్రసాద్‌ శర్మ పరివేష్టితం నిర్వహించగా, పరివేష్టితం ధారణతో అమ్మ వారికి సమర్పించే పట్టువస్త్రాలు, పసుపు, కుంకుమలను ముఖ్యమంత్రి తలపై పెట్టుకుని ఆలయంలోకి అడుగు పెట్టారు. మంగళవాయిద్యాలు, వేద మంత్రాలతో అంతరాలయంలోకి ప్రవేశించి .. శ్రీసరస్వతీ దేవి అలంకారంలో దర్శనమిస్తున్న అమ్మ వారి పేరున సమర్పించారు. అంతరాలయంలో ప్రధాన అర్చకులు లింగం బట్ల దుర్గాప్రసాద్‌, ఇతర అర్చకులు ప్రత్యేక పూజలు నిర్వహించారు. ఆశీర్వచన మండపంలో వేద పండితులు సీఎం జగన్మోహన్‌ రెడ్డికి ఆశీర్వచనం పలికి అమ్మవారి చిత్రపటం, ప్రసాదాలు అందజేశారు. ఈ కార్యక్రమంలో రాష్ట్ర హోంశాఖ మంత్రి తానేటి వనిత, రాష్ట్ర దేవాదాయ ధర్మాదాయ శాఖ మంత్రి, ఉప ముఖ్యమంత్రి కొట్టు సత్యనారాయణ, రాష్ట్ర గృహ నిర్మాణ శాఖ మంత్రి జోగి రమేష్‌,, ముఖ్యమంత్రి కార్యదర్శి రేవు ముత్యాల రాజు, దేవాదాయ కమిషనర్‌ ఎం.హరి జవహర్‌ లాల్‌, ఎంపీ నందిగం సురేష్‌, బాలసౌరి శాసనమండలి సభ్యులు తలసిల రఘురాం, మొండితోక అరుణ్‌ కుమార్‌, కల్పలత రెడ్డి, ఎండి రుహుల్లా, శాసనసభ్యులు కొడాలి నాని, వెల్లంపల్లి శ్రీనివాసరావు, మల్లాది విష్ణు, కె.అనిల్‌ కుమార్‌, మహిళా కమిషన్‌ చైర్‌ పర్సన్‌ వాసిరెడ్డి పద్మ, నగర మేయర్‌ రాయన భాగ్యలక్ష్మి, ఆలయ ఈవో డి. భ్రమరాంబ, జిల్లా కలెక్టర్‌ ఎస్‌ ఢల్లీి రావు, నగర పోలీస్‌ కమిషనర్‌ క్రాంతి రానా టాటా, స్థానిక ప్రజాప్రతినిధులు, తదితరులు పాల్గొన్నారు.
