జెలన్‌స్కికి షాక్…

కీవ్‌,సెప్టెంబరు 25 (ఆంధ్రపత్రిక): ఇజ్రాయిల్‌ చర్యపట్ల తాను దిగ్భ్రాంతికి గురయ్యానని ఉక్రెయిన్‌ అధ్యక్షుడు జెలెన్‌స్కీ పేర్కొన్నారు. రష్యా దాడులను ఎదుర్కొనేందుకు ఇజ్రాయిల్‌ క్షిపణి నిరోధక వ్యవస్థలను అందించడంలో విఫలమైందని అన్నారు. ఇజ్రాయిల్‌కు ఏమి జరిగిందో తనకు తెలియదని, తాను నిజాయితీగా, నిక్కచ్చిగా ఉన్నానని, వైమానిక రక్షణ వ్యవస్థను ఎందుకు ఇవ్వలేదో అర్థం కాలేదని, తాను షాక్‌లో ఉన్నానని జెలెన్‌స్కీ పేర్కొన్నారు. ఫ్రెంచ్‌ విలేకరులకు ఇచ్చిన ఇంటర్వ్యూలో జెలెన్‌స్కీ ఈ వ్యాఖ్యలు చేశారు. ఈ రికార్డింగ్‌ను శనివారం ఆయన కార్యాలయం విడుదల చేసింది. యుద్ధ ప్రారంభ కాలంలోనే ఐరన్‌డోమ్‌ వ్యవస్థ గురించి ప్రస్తావించాడు జెలెన్‌ స్కీ. ఈ ఆయుధాన్ని ఇజ్రాయెల్‌ గాజాలో పాలస్తీనియన్‌ మిలిటెంట్లు కాల్చే రాకెట్లను అడ్డుకునేందుకు ఉపయోగిస్తుంది. ఇజ్రాయెల్‌. తాము రష్యా దాడిని కచ్చితంగా ఖండిస్తున్నామంటూనే మాస్కోతో సంబంధాలు దెబ్బతినకుండా ఉండేలా అత్యంత జాగురతతో వ్యవహరిస్తోంది. వాస్తవానికి ఇజ్రాయెల్‌ దళాలు ఇరానియన్‌ అనుకూల మిలీషియాపై దాడి చేస్తూ ఉంటాయి. అలాగే ఇజ్రాయెల్‌ సిరియా విషయమై రష్యాతో కొంత విపత్కర పరిస్థితిని కూడా ఎదర్కొంటోంది. ఈ నేపథ్యంలోనే ఇజ్రాయెల్‌ ఉక్రెయిన్‌కి ఆయుధ సాయం అందించేందుకు ముందుకు రాలేకపోతోంది. దీంతో సిరియా, రష్యాలకు సంబంధించి ఇజ్రాయిల్‌ క్లిష్ట పరిస్థితిని ఎదుర్కొంటోందని తాను అర్థం చేసుకున్నానని జెలెన్‌ స్కీ అన్నారు. ఇజ్రాయిల్‌ ఉక్రెయిన్‌కు ఎలాంటి సైనిక సాయం అందించలేదని చెప్పారు. అయితే ఇజ్రాయెల్‌ మాత్రం ఉక్రెయిన్‌కి ఆయుధాలను అందించేందుకు నిరాకరిస్తోంది. అయినా తాము ఆయుధ సాయం చేసే విషయంపై కట్టుబడిలేమని పేర్కొంది. ఉక్రెయిన్‌కి సాయం చేస్తామని మాత్రమే చెప్పామని సమర్థించుకుంది.