ఉత్సాహంగా రాహుల్‌ భారత్‌ జోడో యాత్ర

హైదరాబాద్‌,నవంబర్‌ 2 (ఆంధ్రపత్రిక): కాంగ్రెస్‌ అగ్రనేత రాహుల్‌గాంధీ చేపట్టిన ‘భారత్‌ జోడో యాత్ర’ నగరంలో ఉత్సాహంగా కొనసాగుతోంది. బుధవారం ఉదయం గాంధీయన్‌ ఐడియాలజీ సెంటర్‌ నుంచి ప్రారంభమైన యాత్ర న్యూబోయిన్‌పల్లి, బాలానగర్‌ మెయిన్‌రోడ్డు, సుమిత్రా నగర్‌ ఐడీపీఎల్‌ ఉద్యోగుల కాలనీ మీదుగా మదీనాగూడ చేరుకుంది.మధ్యాహ్న భోజన విరామం అనంతరం పాదయాత్ర మియాపూర్‌లోని ఇందిరానగర్‌ కాలనీ, రామచంద్రాపురం, పటాన్‌చెరు శాంతినగర్‌ మీదుగా ముత్తంగి వరకు సాగనుంది.యాత్ర పొడవునా కాంగ్రెస్‌ ముఖ్యనేతలు సహా కార్యకర్తలు పెద్ద సంఖ్యలో పాల్గొని రాహుల్‌తో కలిసి నడిచారు. పాదయాత్ర మార్గంమధ్యలో పలుచోట్ల ప్రజల కష్టాలను రాహుల్‌ తెలుసుకున్నారు. ఆయన్ను చూసేందుకు పెద్ద ఎత్తున ప్రజలు రోడ్లకు ఇరువైపులా వేచిచూశారు. పాదయాత్రలో బాలీవుడ్‌కి చెందిన సినీనటి పూజా భట్‌ రాహుల్‌ను కలిశారు.