మహాత్మాగాంధీ జీవితం ఆధారంగా ఎన్నో సినిమాలొచ్చాయి. ఇప్పుడు మహాత్ముడి జీవిత కథతో ‘గాంధీ’ సిరీస్‌ తెరకెక్కుతోన్న సంగతి తెలిసిందే. ఇప్పుడు ఈ సిరీస్‌కు సంబంధించి ఓ ఆసక్తికర విషయాన్ని సిరీస్‌ బృందం పంచుకుంది.
ఈ సిరీస్‌కు ప్రముఖ సంగీత దర్శకుడు ఏఆర్‌ రెహమాన్‌ స్వరాలు అందించనున్నట్లు తెలుపుతూ సిరీస్‌ను నిర్మిస్తోన్న అప్లాజ్‌ ఎంటర్‌టైన్‌మెంట్‌ స్టూడియో సంస్థ గాంధీ జయంతి సందర్భంగా వెల్లడించింది.
ఏఆర్‌ రెహమాన్‌ మాట్లాడుతూ.. ‘ఈ సిరీస్‌లో గాంధీజీ జీవితం, దేశ స్వాతంత్య్రం కోసం ఆయన చేసిన పోరాటం.. గురించి తెలుస్తుంది. అప్లాజ్‌ ఎంటర్‌టైన్‌మెంట్‌ సహకారంతో, హన్సల్‌ మెహతా దర్శకత్వంలో ఈ సిరీస్‌కు సంగీతం అందించడం గౌరవంగా ఉంది’ అన్నారు. ‘ఇది తరతరాలకు స్ఫూర్తినిచ్చే కథ. గాంధీ జీవితంలోని భావోద్వేగం, ఆధ్యాత్మికతను తెరపైకి తీసుకురావడమే మా లక్ష్యం’ అని సిరీస్‌ బృందం తెలిపింది. ప్రముఖ దర్శకుడు హన్సల్‌ మెహతా ఈ సిరీస్‌ను రూపొందిస్తున్నారు.
