ఈ క్రమంలో నేటి నుంచి కొత్త షాపుల్లో మద్యం అమ్మకాలు ప్రారంభం కానున్నాయి. నూతన మద్యం పాలసీ అమలు నేపథ్యంలో 2014లో అందుబాటులో ఉన్న బ్రాండ్లన్నీ తిరిగి అందుబాటులోకి తీసుకువచ్చేందుకు ఎక్సైజ్ శాఖ కసరత్తు చేస్తోంది. అంతేకాదు రూ.99 రూపాయలకే ఇవ్వాలని భావించిన క్వార్టర్ బాటిల్ మద్యాన్ని కూడా అందుబాటులోకి తీసుకువచ్చింది. కొత్త పాలసీ కింద బుధవారం ఉదయం 10 గంటలకు వైన్ షాపులు తెరుచుకోనున్న సంగతి తెలిసిందే. లిక్కర్ షాప్స్ టైమింగ్స్ రాత్రి 10 గంటల వరకు అని ప్రభుత్వం వెల్లడించింది.

ప్రతి షాపులోనూ డిజిటల్‌ పేమెంట్స్‌..
వైసీపీ హయాంలో మద్యం దుకాణాల్లో డిజిటల్ పేమెంట్స్ జరగలేదు. ఓన్లీ క్యాష్ మీద మాత్రమే అమ్మకాలు జరిగాయి. అయితే కూటమి ప్రభుత్వం మాత్రం డిజిటల్ పేమెంట్లు అందుబాటులోకి తీసుకువచ్చింది. వాస్తవానికి కూటమి ప్రభుత్వం వచ్చినప్పటి నుంచి డిజిటల్ పేమెంట్లు గణనీయంగా పెరిగాయి. జూన్ నుంచి ప్రతినెలా 9 శాతం పెరిగినట్లు తెలుస్తోంది. డిజిటల్ పేమెంట్ పద్ధతిని అవలంభించడం ద్వారా మద్యం అమ్మకాల్లో పారదర్శకత పెరగడంతోపాటు ప్రభుత్వ ఖజానాకు భారీ మొత్తంలో ఆదాయం లభించనుంది.

క్వార్టర్ రూ.99కే
రాష్ట్రంలో నూతన మద్యం పాలసీ అమలు ప్రారంభమైంది. నూతన పాలసీలో భాగంగా క్వార్టర్‌ రూ.99 ధరతో మద్యం అందుబాటులోకి తెస్తోంది. ఈ నూతన పాలసీని వారం రోజుల్లో అమలులోకి తీసుకువచ్చేందుకు ప్రభుత్వం చర్యలు తీసుకుంటుంది. రూ.99కే క్వార్టర్ బాటిల్ సరఫరా చేసేందుకు కంపెనీలు ముందుకొచ్చాయి. తొలుత 2 లక్షల కేసులు తీసుకోబోతున్నారు. అనంతరం మందుబాబుల స్పందన చూసి తర్వాత స్టాక్‌కు ఆర్డర్ పెట్టబోతున్నారు.

ధరల్లో మార్పులు
ధరల విషయంలోనూ ప్రభుత్వం మార్పులు చేర్పులు చేసింది. మద్యం అమ్మకాల పైన రెండు శాతం సెస్ విధిస్తూ ఉత్తర్వులు జారీ చేసింది. మద్యం విక్రయాలపై 2 శాతం సెస్ విధిస్తున్నట్లు ప్రభుత్వం ప్రకటించింది. ఈ శిస్తు రూపంలో వచ్చే ఆదాయాన్ని ప్రభుత్వం నార్కోటిక్ నియంత్రణ చర్యలు, డీ-అడిక్షన్, పునారావాస కేంద్రాల ఏర్పాటుకు ఖర్చు చేస్తుంది. అదే విధంగా ఏదైనా ఐఎంఎఫ్ఎల్ బాటిల్ ఎమ్మార్పీ ధర రూ 150.50 గా ఉంటే..ఆ దానిని రూ 160 వసూలు చేయాలని నిర్ణయించారు. ఈ మేరకు ప్రివిలేజ్ ఫీజు అదనంగా పెంచింది. క్వార్టర్ బాటిల్ ధర 90.50గా ఉంటే ఏపీఎఫ్ కలిపి దాని ధర రూ.100 వసూలు చేయనుంది.

మద్యం ధరలపై కమిటీ నివేదిక
మరోవైపు మద్యం ధరల విషయంలోనూ పారదర్శకంగా ఉండాలని ప్రభుత్వం భావిస్తోంది. ఇప్పటికే ఉన్న మద్యం బాటిళ్ల ధరలను ఈ కమిటీ సవరించనుంది. అనంతరం మద్యం ధరలను ఫైనల్ చేయనుంది. ఇందులో పాత బ్రాండ్ల ధరల సవరణతో పాటు కొత్త బ్రాండ్ల ధరల నిర్ణయం కూడా ఉంటుందని తెలుస్తోంది. ఆ తర్వాత నుంచి కమిటీ నిర్ణయించిన కొత్త ధరల మేరకే విక్రయాలు జరగబోతున్న సంగతి తెలిసిందే.

అందుబాటులోకి పాత బ్రాండ్లు
ఇదిలా ఉంటే ఎంఎన్‌సీ కంపెనీల మద్యం బ్రాండ్లను సైతం తీసుకురావాలని ఏపీ ప్రభుత్వం నిర్ణయం తీసుకుంది. ప్రముఖ బ్రాండ్లు అయిన మెక్‌డోవెల్స్, ఇంపీరియల్ బ్లూ వంటి బ్రాండ్ల మద్యం ఇప్పటికే ఏపీకి చేరుకుంది. ఈ మేరకు ఇప్పటికే ఎక్సైజ్ శాఖ అధికారులు కసరత్తు మెుదలుపెట్టారు. కింగ్ ఫిషర్, బడ్వైజర్ బీర్లు, రాయల్ ఛాలెంజ్, వోడ్కా, బ్లాక్ డాగ్, జానీవాకర్, వాట్ 69, యాంటిక్విటీ వంటి బ్రాండ్ల మద్యంను ఏపీ వైన్ షాపుల్లో విక్రయించనున్నారు.