అయ్యన్న విద్యా సంస్థల్లో “జాతీయ సైన్స్ దినోత్సవం”

కె.కోటపాడు,ఫిబ్రవరి28(ఆంధ్రపత్రిక):అంతర్జాతీయ వైజ్ఞానిక రంగంలో మనదేశ కీర్తిపతాకాన్ని ఎగురవేసిన నోబెల్ బహుమతి గ్రహీత, భారతరత్న, భౌతిక శాస్త్రవేత్త సి.వి.రామన్ ను ఆదర్శంగా తీసుకోవాలని ఇక్కడి అయ్యన్న విద్యాసంస్థల అధినేత డాక్టరు ఖాశీం అన్నారు. “నేషనల్ సైన్స్ డే” సందర్బంగా మంగళవారం పాఠశాల ప్రాంగణంలో ప్రముఖ భౌతిక శాస్త్రవేత్త సి.వి.రామన్ చిత్రపటానికి విద్యార్థులు, ఉపాధ్యాయులు పూల మాలలు వేశారు. ఈ కార్యక్రమంలో ముఖ్య అతిధిగా పాల్గొన్న డాక్టరు ఖాశీం మాట్లాడుతూ 1928 ఫిబ్రవరి 28న రామన్ ఎఫెక్ట్ ను కనుగొన్నారని తెలిపారు. దీన్ని పురస్కరించుకొని రామన్ కు 1930లో నోబెల్ బహుమతి అందచేశారన్నారు. 1986లో ఫిబ్రవరి 28న “నేషనల్ సైన్స్ డే” గా భారత ప్రభుత్వం ప్రకటించిందని తెలిపారు. “నా మతం సైన్స్.. దానినే జీవితాంతం ఆరాధిస్తాను” అన్న సి.వి.రామన్ సందేశంను ఈ సందర్భంగా విద్యార్థులకు అయన గుర్తు చేశారు. పాఠశాల ప్రాంగణంలో గల వందమంది సైంటిస్ట్ ల చిత్రపటాలవద్ద వైజ్ఞానిక సంబంధిత నమూనాలను ప్రదర్శించిన విద్యార్థులను డాక్టరు ఖాశీం అభినందించారు. ఈ కార్యక్రమంలో సైన్స్ ఉపాధ్యాయులు హరీషా, సతీష్, సీముసురు రమణ, కె.ఎస్.ఎస్.వి.ప్రసాద్, ఎం. కళ్యాణి తదితర్లు పాల్గొన్నారు.