మోడీపాలనకు వచ్చేఎన్నికల్లో స్వస్తి పలుకుదాం

కె.కోటపాడు,ఏప్రిల్16(ఆంధ్రపత్రిక):దేశసంపదను ఆదానీ, అంబానీలకు ధారాదత్తం చేస్తున్న మోడీ పాలనకు రాబోయే ఎన్నికల్లో స్వస్తి పలుకుదామని సి.పి.ఐ.జిల్లా కార్యదర్శి బాలేపల్లి వెంకటరమణ పిలుపునిచ్చారు. ఆదివారం ఇక్కడ కె.కోటపాడు, దేవరాపల్లి మండలాలకు సంబధించి “ప్రచారభేరి”ని అయన జెండాఊపి ప్రారంభించారు. ఈ సందర్భంగా వెంకటరమణ మాట్లాడుతూ బీజేపీ అధికారంలోకివస్తే వందరోజుల్లో ధరలు తగ్గిస్తామని, ఏడాదికి రెండు కోట్లమంది నిరుద్యోగులకు ఉద్యోగాలిస్తామని, విదేశాల్లో దాచుకున్నవారి నల్లధనంను బయటపెడతామని, రైతులు ఆదాయం రెట్టింపు చేస్తామని కల్లబొల్లి కబుర్లతో అధికారంలో కొచ్చిన మోడీ కార్పొరేట్ కంపెనీలకు ఊడిగం చేస్తున్నారని విమర్శించారు. రాష్ట్రానికి ప్రత్యేకహోదా, విభజనహామీలు, విశాఖకు రైల్వేజోన్, వెనకబడినజిల్లాలకు అభివృద్ధినిధులు, విశాఖస్టీల్ ప్లాంట్ ప్రైవేటీకరణ విధానంరద్దు తదితర అంశాలపై మోడీ ప్రభుత్వాన్ని నిలదీసే ధైర్యం వైసీపీ ప్రభుత్వానికి లేకపోవడం మన దురదృష్ట కరమని వెంకటరమణ అన్నారు.ఈ కార్యక్రమంలో సిపిఐ జిల్లా సహాయ కార్యదర్శిలు రాజాన దొరబాబు, ఎం.రామునాయుడు, జిల్లా కార్యవర్గ సభ్యులు డి.సిహెచ్.క్రాంతి, మండల కార్యదర్శి గొర్లె దేముడుబాబు, నాయకులు రెడ్డి అప్పలనాయుడు, ఇల్లాకు రాము, సి.పి.ఎం. నాయకులు యర్రా దేముడు, గాడి ప్రసాద్ తదితరులు పాల్గొన్నారు.