షారూఖ్‌ పఠాన్‌ కోసం అభిమానుల ఎదురుచూపు

అక్టోబర్ 20 (ఆంధ్రపత్రిక): టాలీవుడ్‌ హీరోలకు సమానంగా షారుఖ్‌ఖాన్‌కు తెలుగులో విపరీతమైన క్రేజ్‌ ఉంది. ఈయన సినిమా రిలీజ్‌ అవుతందంటే ఇక్కడ కూడా కటౌట్‌లు, బ్యానర్‌లు పడుతుంటాయి. అయితే షారుఖ్‌ నుండి సినిమా వచ్చి దాదాపు నాలుగేళ్లయింది. ’జీరో’ తర్వాత ఇప్పటివరకు ఈయన నటించిన సినిమా రిలీజ్‌ రాలేదు. మధ్యలో కొన్ని సినిమాల్లో గెస్ట్‌ అప్పియరెన్స్‌ ఇచ్చినా.. అవి షారుఖ్‌ ఫ్యాన్స్‌ను పూర్తిగా సంతృప్తి పరుచలేకపోయాయి. షారుఖ్‌ను ఫుల్‌ లెంగ్త్‌ రోల్‌లో ఎప్పుడెప్పుడు చూద్దామా అని అభిమానులు వేయి కళ్లతో ఎదురు చూస్తున్నారు. ప్రస్తుతం షారుఖ్‌ మూడు సినిమాలు సెట్స్‌పైన ఉంచాడు. అందులో ’పఠాన్‌’ ఒకటి.సిద్దార్థ్‌ ఆనంద్‌ దర్శకత్వం వహించిన ఈ చిత్రం షూటింగ్‌ పూర్తి చేసుకుని పోస్ట్‌ ప్రొడక్షన్‌ పనులలో బిజీగా ఉంది. ఈ చిత్రంలో షారుఖ్‌ రా ఏజెంట్‌గా కనిపించనున్నాడు. ఇప్పటికే రిలీజైన పోస్టర్లు, గ్లింప్స్‌ సినిమాపై విపరీతమైన అంచనాలు నెలకొల్పాయి. ఇదిలా ఉంటే ఈ చిత్రానికి సంబంధించిన ఓ వార్త నెట్టింట తెగ వైరల్‌ అవుతుంది. ఈ సినిమా టీజర్‌ను షారుఖ్‌ బర్త్‌డే సందర్భంగా నవంబర్‌ 2న రిలీజ్‌ చేయనున్నట్లు వార్తలు వస్తున్నాయి. దీనిపై త్వరలోనే అధికారికంగా ప్రకటన వచ్చే చాన్స్‌ ఉంది. ఈ చిత్రంలో దీపికా పదుకొనే, జాన్‌ అబ్రహం కీలకపాత్రలు పోషిస్తున్నారు. యాక్షన్‌ థ్రిల్లర్‌ నేపథ్యంలో తెరకెక్కిన ఈ చిత్రం రిపబ్లిక్‌ డే సందర్బంగా వచ్చే ఏడాది జనవరి 25న పాన్‌ ఇండియా స్థాయిలో రిలీజ్‌ కానుంది.