రాష్ట్రానికి ప్రత్యేక హోదాతోనే అభివృద్ధి సాధ్యం

విజయవాడ, సెప్టెంబర్ 30 (ఆంధ్రపత్రిక):  రాష్ట్రానికి ప్రత్యేక హోదాతోనే రాష్ట్ర అభివృద్ధి సాధ్యపడుతుందని గాంధీ దేశం సోషల్ వెల్ఫేర్ ట్రస్ట్ వ్య‌వ‌స్థాప‌క అధ్యక్షుడు గాంధీ నాగరాజన్ చెప్పారు. శుక్రవారం ఊర్మిళానగర్‌లోని ట్రస్ట్ కార్యాలయం వద్ద ట్రస్ట్ రాష్ట్ర మహిళా అధ్యక్షురాలు బాపటి భారతి కార్యనిర్వహణలో ముఖ్య మహిళా అధ్యక్షురాలు ఆర్.ఎన్.సొరంజని సహాయ సహకారంతో ఆయన ప్రత్యేక హోదా సాధన కోసం కళ్ళకు గంతలు కట్టుకొని ఉదయం నుండి సాయంత్రం వరకు ఒకరోజు నిరాహార దీక్ష చేశారు. ఈ సందర్భంగా నాగరాజ‌న్ విలేకరులతో మాట్లాడుతూ.. మహాత్మా గాంధీ జనవరి 30వ తేదీన హత్యకు గురై మృతి చెందారని, అందుకే ప్రతినెల 30వ తేదీన తాను శాంతియుతంగా గాంధీజీ ఆశయ సాధన కోసం ఆందోళన చేస్తున్న‌ట్లు తెలిపారు. గతంలో ఆంధ్రప్రదేశ్‌కు ప్రత్యేక హోదా ఇస్తామని కేంద్ర ప్రభుత్వం చేసిన వాగ్దానాన్ని నిలబెట్టుకోవాలని డిమాండ్ చేశారు. రాష్ట్రానికి ప్రత్యేక హోదా వచ్చేవరకు శాంతియుతంగా వివిధ రూపాల్లో ఆందోళనలు నిర్వహిస్తామని ఆయన పేర్కొన్నారు. కేంద్ర రాష్ట్ర ప్రభుత్వాల వైఖరి వల్ల ప్రజల మధ్య ఆర్థిక అసమానతలు పెరుగుతుండటం, గాంధీని హత్య చేసిన గాడ్సేకు కొన్ని రాజకీయ పార్టీలు నీరాజనాలు పలకడం ఆందోళనకరమని ఆయన విమర్శించారు.