రక్తదానంచేసిన చంద్రయ్యపేట యువకులు

కె.కోటపాడు,మార్చి30(ఆంధ్రపత్రిక):శ్రీరామనవమి పర్వదినాన్ని పురస్కరించుకొని బృహత్తరమైన సేవా కార్యక్రమాన్ని కొనసాగించారు మండలంలోని చంద్రయ్యపేట గ్రామానికి చెందిన యువకులు. రాములోరి కళ్యాణంవేల లోకకళ్యాణార్ధం ప్రాణదాతలుగా నిలిచారు. విశాఖపట్నానికి చెందిన బ్లడ్ బ్యాంక్ సౌజన్యంతో గ్రామంలో శ్రీరామాలయం వద్ద గురువారం నిర్వహించిన రక్తదాన శిబిరంలో గ్రామానికి చెందిన సుమారు 50 మంది యువకులు స్వచ్ఛందగా రక్తదానం చేశారు. ప్రాణాపాయ వేళ పునర్జీవం పోసేందుకు అవసరమయ్యే రక్తదానం చేస్తున్న యువకులకు గ్రామస్తులు అభినందనలు తెలిపారు. ఇప్పటికి ఐదుసార్లు రక్తదానం చేశామని రక్తదాతలయిన యువకులు తెలిపారు.