కైకాల,చలపతి కుటుంబాలకు చంద్రబాబు పరామర్శ

హైదరాబాద్‌,డిసెంబర్‌ 27 (ఆంధ్రపత్రిక): సినీ నటులు కైకాల సత్యనారాయణ,చలపతిరావు కుటుంబ సభ్యులను తెలుగుదేశం పార్టీ అధినేత, మాజీ ముఖ్యమంత్రి చంద్రబాబు నాయుడు పరామర్శించారు. తెలంగాణ టీడీపీ అధ్యక్షుడు కాసాని జ్ఞానేశ్వర్‌, రావుల చంద్రశేఖర్‌ రెడ్డిలతో కలసి కైకాల సత్యనారాయణ, చలపతిరావు ఇండ్లకు వెళ్లి పరామర్శించారు. కైకాల సత్యనారాయణ తెలుగుదేశం పార్టీలో ఎంపీగా పనిచేసినప్పటి నుంచి తనకున్న అనుబంధాన్ని చంద్రబాబు గుర్తు చేసుకున్నారు. కైకాల కుటుంబ సభ్యులకు తనతోపాటు తెలుగుదేశం పార్టీ నాయకులంతా అండగా ఉంటామని అన్నారు. కైకాల సత్యనారాయణ అంత్యక్రియలకు హాజరుకాలేకపోయిన చంద్రబాబు మంగళవారం ప్రత్యేకంగా ఆయన ఇంటికి వెళ్లి కుటుంబ సభ్యులను పరామర్శించారు. అలాగే చలపతిరావు కుటుంబ సభ్యులను కూడా చంద్రబాబు పరామర్శించారు. చలపతిరావు కుమారుడు నటుడు, దర్శకుడు రవిబాబు, ఆయన సోదరీమణులతో చంద్రబాబు మాట్లాడారు. చలపతిరావుతో చాలా మంచి సంబంధాలు ఉండేవని గుర్తు చేసుకున్నారు. చలపతిరావు భౌతికంగా లేకపోయినా.. అండదండగా ఉంటానని చంద్రబాబు హావిూ ఇచ్చారు. కైకాల సత్యానారాయణ గత కొంత కాలంగా అనారోగ్యంతో బాధపడుతూ ఈ నెల 23న కన్నుమూశారు. తమ్మారెడ్డి చలపతిరావు గత శనివారం రాత్రి అకస్మాత్తుగా గుండెపోటుతో తుదిశ్వాస
విడిచారు. ఆయన అంత్యక్రియలు బుధవారం జరగనున్నాయి.