బడుగు బలహీనుల చైతన్య దీప్తి వంగవీటి మోహన రంగా.

గుంటూరు,డిసెంబర్ 26( ఆంధ్రపత్రిక ): బడుగు బలహీన వర్గాల అభ్యున్నతి కోసం కృషి చేసిన నాయకుడు వంగవీటి మోహనరంగా అని వైయస్సార్ కాంగ్రెస్ పార్టీ గుంటూరు నగర ప్రధాన కార్యదర్శి బందా రవీంద్రనాథ్, జిల్లా గ్రంథాలయ సంస్థ ఛైర్మన్ బత్తుల దేవానంద్, యువజన విభాగం రాష్ట్ర ప్రధాన కార్యదర్శి నూనె ఉమామహేశ్వరరెడ్డి కీర్తించారు. కాపు నేతలు దాసరి ప్రసాద్, కొత్తపేట సతీష్ ఆధ్వర్యంలో స్థానిక కొత్తపేట శనక్కాయల ఫ్యాక్టరీ సెంటర్‌లో వంగవీటి మోహనరంగ 34వ వర్ధంతి వేడుకలు ఘనంగా జరిగాయి. సోమవారం జరిగిన ఈ వేడుకలలో వారు ముఖ్య అతిథులుగా పాల్గొని రంగా విగ్రహానికి పూలమాల వేసి ఘనంగా నివాళులర్పించారు. అనంతరం పేద విద్యార్థులకు ఉపకార వేతనాలు పంపిణీ చేశారు. ఈ సందర్భంగా వారు మాట్లాడుతూ, వంగవీటి మోహనరంగా ఒక కులానికో లేక ఒక వర్గానికో చెందిన వ్యక్తి కాదన్నారు. అణగారిన వర్గాల ఆశాజ్యోతి మాత్రమే కాక బడుగు, బలహీనుల చైతన్యదీప్తి అని వ్యాఖ్యానించారు. తరతరాలుగా పీడింపబడుతున్న పేదల పక్షాన నిలిచిన నిజమైన ప్రజా నాయకుడిని పేర్కొన్నారు. రాజకీయాల్లోకి వచ్చిన అనతి కాలంలోనే వంగవీటి మోహన రంగా తనకంటూ ప్రత్యేక గుర్తింపు తెచ్చుకున్నారని, ఎవరికి ఏ ఆపద వాటిల్లినా నేనున్నానని ముందుకొచ్చి వారి కోసం పోరాడే మానవతావాదిగా వర్ణించారు. ఎళ్ళవేళలా బాధితులకు అండగా ఉండాలనేది రంగా ఆశయమని, ఆయన ఆశయ సాధనకు ప్రతి ఒక్కరు కృషి చేయాలని వారు కోరారు. ఈ కార్యక్రమంలో బీసీ నేతలు పల్లపు మహేష్‌బాబు, లంకోటి లీలా నాగ కౌండిన్య, దళిత నేతలు పరిశపోగు భరత్, మాదాసు కిరణ్, కాపు నేత డాక్టర్ సిహెచ్ నాగరాజు తదితరులు పాల్గొన్నారు.