చిత్రసీమలో మరో విషాదం

నేపథ్య గాయని వాణీజయరామ్‌ కన్నుమూత
చిత్రసీమలో మరో విషాదం చోటుచేసుకుంది. విశ్వనాథ మరణంతో తేరుకోని పరిశ్రమకు మరో దుర్వార్త చేరింది. ప్రముఖ నేపథ్య గాయని వాణీజయరామ్‌ కన్ను మూశారు. వాణీ జయరామ్‌(78) చెన్నైలోని తన స్వగృహంలో తుదిశ్వాస విడిచారు. 1945 నవంబర్‌ 30న దురైస్వామి, పద్మావతి దంపతులకు వాణీ జయరామ్‌ జన్మించారు. తమిళనాడులోని వెల్లూరు ఈమె స్వస్థలం. హిందూస్థానీ క్లాసికల్‌ సింగింగ్‌లో ప్రావీణ్యం పొందిన వాణీ జయరామ్‌ తెలుగు, తమిళ, కన్నడ, మలయాళ హిందీ భాషల్లో 4500లకు పైగా పాటలు పాడారు. అందులో తెలుగులో 1000కు పైగా తెలుగు పాటలే! కెవి.మహదేవన్‌, ఎం.ఎస్‌. విశ్వనాధన్‌, ఇళయరాజా, పెండాల్య, చక్రవర్తి, సాలూరి రాజేశ్వరరావు సంగీతంలో ఎక్కువ పాటలు పాడారు. సంగీత రంగానికి ఆమె చేసిన సేవలకు గానూ కేంద్ర ప్రభుత్వం ఆమెను పద్మ భూషణ్‌ అవార్డును ప్రకటించగా, అది అందుకోకుండానే ఆమె కన్ను మూయడం బాధాకరం. మూడు జాతీయ పురస్కారాలను కూడా ఆమె అందుకున్నారు. వాణీ జయరామ్‌ మరణంతో సంగీతలోకం కన్నీరుమున్నీరైంది. సినీ ప్రముఖులు ఆమె ఆత్మకు శాంతి చేకూరాలని ప్రార్థిస్తున్నారు.