చాలా కాలంగా అనారోగ్యంతో బాధపడుతున్న ఆయన ముంబైలోని బ్రీచ్ క్యాండీ ఆస్పత్రిలో చికిత్స పొందుతూ తుదిశ్వాస విడిచారు. టాటా గ్రూపును ఉన్నత శిఖరాలకు తీసుకెళ్లిన రతన్ టాటా మార్చి 1991 నుండి డిసెంబర్ 2012 వరకు టాటా సన్స్ ఛైర్మన్‌గా టాటా గ్రూప్‌ను నడిపించారు. విదేశాల్లో చదువు పూర్తి చేసుకున్న రతన్ టాటా గ్రూప్ కంపెనీ టాటా ఇండస్ట్రీస్ లో అసిస్టెంట్ గా చేరారు.ఆ తర్వాత జంషెడ్‌పూర్‌లోని టాటా ప్లాంట్‌లో కొన్ని నెలల పాటు శిక్షణ తీసుకున్నారు. శిక్షణ పూర్తి చేసుకున్న తర్వాత ఆయన తన బాధ్యతలను నిర్వహించడం మొదలు పెట్టారు. రతన్‌టాటా. వ్యాపార రంగంలో సాహాసాలకు ఆయన మారుపేరుగా మారారు. రతన్ టాటా గురించి చెప్పడానికి ఎంతో ఉంది.

ఉప్పు నుంచి విమానం వరకు ప్రయాణం

వంటగదిలో ఉపయోగించే ఉప్పు నుంచి ఆకాశంలో ఎగిరే విమానాల వరకు రతన్ టాటా తన వ్యాపార సామ్రాజ్యాన్ని విస్తరించారు. వ్యాపార రంగంలో సరికొత్త రికార్డులు నెలకొల్పడం ద్వారా టాటా గ్రూప్‌ను ఉన్నత శిఖరాలకు తీసుకెళ్ళారు. దేశంలో టాటా కంపెనీ తొలిసారిగా చేపట్టిన ఉత్పత్తులను గురించి చెప్పాలంటే అనేకం ఉన్నాయి. ఉక్కు కర్మాగారం, విమానయాన సంస్థ ప్రారంభం అయినా సరే తాను అడుగు పెట్టిన వ్యాపార రంగంలో కొత్త రికార్డులు నెలకొల్పారు. టాటా గ్రూప్‌ను ఉన్నత శిఖరాలకు తీసుకెళ్లారు. రతన్ పట్టిందల్లా బంగారమే అనిపించుకున్నారు.

టాటా అయోడిన్ ఉప్పు : టాటా టాటా గ్రూప్ దేశంలోనే తొలిసారిగా అయోడిన్‌తో కూడిన ఉప్పు ప్యాకెట్లను విక్రయించడం ప్రారంభించింది. 1983లో తయారీ మొదలు పెట్టుకున్న ఈ టాటా ఉప్పును నేడు ఇళ్లలో ఉపయోగిస్తున్నారు. దీనితో పాటు టాటా కంపెనీ భారతదేశపు మొట్టమొదటి స్వదేశీ SUV టాటా సఫారిని 1998 సంవత్సరంలో విడుదల చేసింది. 2013 సంవత్సరంలో మొదటి హైడ్రోజన్ బస్సు స్టార్‌బస్ ప్రారంభించారు. అంతేకాదు 2018 లో టాటా నెక్సాన్ 5-స్టార్ రేటింగ్ కారును మార్కెట్లో విడుదల చేసింది. అదే సమయంలో మొదటి స్లిమ్ మెకానికల్ వాచ్ కూడా 2021లో తయారు చేశారు.

నానో కారు ప్రారంభం : ప్రతి వ్యక్తి తన ఇంట్లో కారు ఉండాలని కలలు కంటాడు. అయితే అధిక బడ్జెట్ కారణంగా కారు సామాన్యులకు అందుబాటులో లేదు. రతన్ టాటా కూడా ఈ సమస్యకు పరిష్కారం కనుగొన్నారు.
నానో కారు.. కార్ల ప్రపంచంలో ఓ అద్భుత ఆవిష్కరణ. లక్ష రూపాయలకే ప్రతి ఇంటికి కారు అందిస్తానని హామీ ఇచ్చిన రతన్‌టాటా అలాగే ప్రారంభించారు. ఈ నిర్ణయం ప్రతి ఒక్కరినీ ఆశ్చర్యానికి గురిచేసింది. బైక్‌ ధరలకే కారు అందుబాటులో ఉండటం ఎంత సాహసం? అదే టాటా పరిచయం చేసిన ‘టాటా నానో’ కారు.

ప్రతి ఇంటికి కారు అందిస్తానన్న ఈ దిగ్గజ కల నెరవేరడానికి టాటా గ్రూప్ భారీ నష్టాలను చవిచూసింది. అయినా ఇచ్చిన హామీ మేరకు నానో కార్లను మార్కెట్లో ప్రవేశపెట్టారు రతన్‌టాటా. టాటా నానో కార్ ఇప్పుడు మనం ప్రత్యేకంగా చెప్పాల్సిన అవసరం లేదు. 2008లో లక్ష రూపాయలకే కారు అందుబాటులోకి తీసుకురావడం అప్పట్లో సంచలనంగా మారింది. ప్రపంచంలోనే అత్యంత చౌకైన కారు కూడా ఇదే.. నానో కారును రతన్ టాటా కలల కారుగా చెప్పుకుంటారు.

గ్లోబల్ సంస్థగా మార్చిన రతన్..

1868లో ఒక చిన్న వస్త్ర, వ్యాపార సంస్థగా ప్రారంభమైన టాటా గ్రూప్ నుంచి ఉప్పు, ఉక్కు, కార్ల తయారీ వరకూ వ్యాపార సంస్థల్లో విస్తరించాయి. తర్వాత ప్రపంచ నాయకుడిగా రూపాంతరం చెందింది సాఫ్ట్‌వేర్, పవర్ ప్లాంట్లు , విమానయాన సంస్థలలో అడుగు పెట్టింది టాటా సంస్థ. రతన్ టాటా నాయకత్వంలో టాటా గ్రూప్ ఎన్నో చరిత్రలు సృష్టించిన కాలం ఇది. ఈ టాటా గ్రూప్ కు ఆదాయం, లాభాలు కొత్త శిఖరాలకు చేరుకుంది.

రతన్ టాటా ప్రస్తుతం టాటా ట్రస్ట్ ఛైర్మన్‌గా ఉన్నారు. ఇందులో సర్ రతన్ టాటా ట్రస్ట్ , అలైడ్ ట్రస్ట్ అలాగే సర్ దొరాబ్జీ టాటా ట్రస్ట్, అలైడ్ ట్రస్ట్ ఉన్నాయి. రతన్ టాటా భారతీయ వ్యాపార ప్రపంచానికి చాలా ముఖ్యమైన సహకారం అందించారు. భారతదేశపు ‘రతన్’ అని పిలువబడే ప్రముఖ పారిశ్రామికవేత్త రతన్ టాటా, దేశంలోని ప్రతి పౌరుడు హృదయపూర్వకంగా గౌరవించే వ్యక్తులలో ఒకరు. బిలియనీర్లలో చేరినప్పటికీ తన సింప్లిసిటీ కారణంగా ప్రతి ఒక్కరికీ ప్రియమైన వ్యక్తి అయ్యారు.

బిలియనీర్ అయినప్పటికీ రతన్ టాటా తన జీవితమంతా బ్రహ్మచారిగా మిగిలిపోయారు.. తన ప్రేమని వ్యాపారం అభివృద్ధి వైపు దృష్టి మరలించి వ్యాపార సామ్రాజ్యాన్ని విస్తరించారు. అతను ‘ది టాటా గ్రూప్’ని విజయాల శిఖరాలకు తీసుకెళ్లడంలో తన యవ్వనాన్ని గడిపారు. భారతదేశంలోని రెండు అత్యున్నత పౌర పురస్కారాలు, పద్మ విభూషణ్ (2008), పద్మ భూషణ్ (2000) లభించాయి.