దసరా ఏర్పాట్లపై భక్తులను అడిగి తెలుసుకున్న జిల్లా కలెక్టర్ ఢిల్లీ రావు..

విజయవాడ, సెప్టెంబర్ 27 (ఆంధ్రపత్రిక): రెండవ రోజు మంగళవారం శ్రీ బాలా త్రిపురసుందరీ దేవి అలంకారంలోను అమ్మవారు దర్శనమిచ్చి భక్తులను పరవశింపచేసారు. ఇంద్రకీలాద్రిపై ఉదయం సమయాల్లోనూ సాయంకాల సమయాల్లోనూ భక్తుల రద్దీ అధికంగా కనిపిస్తుంది. అమ్మవారిని దర్శించుకునే భక్తులకు ఏ కొద్దిపాటి అసౌకర్యం కలగకూడదనే ఉద్దేశ్యంతో జిల్లా కలెక్టర్ ఢిల్లీ రావు స్వయంగా క్యూ లైన్ లను పరిశీలించి భక్తులకు కలిగే అసౌకర్యాలపై అడిగి తెలుసుకున్నారు. ఏర్పాట్లు బాగున్నాయని ఏవిధమైన ఇబ్బందులు లేవని పలువురు భక్తులు కలెక్టర్ కు బదులిచ్చారు. వృద్దులకు, చిన్నపిల్లలకు పాలు సరఫరా సౌకర్యం, వికలాంగుల కోసం వీల్ చైర్ లు ఏర్పాటు వంటి సౌకర్యాలను పర్యవేక్షించడంతో పాటు కలెక్టర్ ఛాంబర్ నుండి ఇంద్రకీలాద్రి పర్వతం పరిసర ప్రాంతాలతో సహా సి.సి. కెమెరాలతో మానిటరింగ్ సిస్టమ్ ను స్వయంగా పరిశీలించారు. క్యూ లైన్ లలో బారికేడింగ్ ను కలుపుతూ బిగించిన ఇనుప తీగలను పరిశీలించి క్యూ లైన్ ల ద్వారా వెళ్లే భక్తుల చేతులకు తగిలి ప్రమాదం ఏర్పడవచ్చని గ్రహించిన జిల్లా కలెక్టర్ వెంటనే ఆయా ఇనుప తీగలను విప్పించి క్లాత్ ద్వారా బారికేడింగ్ ను కట్టేలా సంబంధిత అధికారులను ఆదేశించియున్నారు. కలెక్టర్ ఆదేశాల మేరకు సిబ్బంది ఇనుప తీగలను తీసి అదేస్థానంలో క్లాత్ తో బిగించి కట్టడం జరిగింది.