హైదరాబాద్‌: ఫిలింఫేర్‌ అవార్డుల నేపథ్యంలో టాలీవుడ్‌ స్టార్స్‌ అల్లు అర్జున్‌ (Allu Arjun), నాని (Nani) మధ్య ఆసక్తికర సంభాషణ జరిగింది. ప్రస్తుతం ఇది నెట్టింట వైరల్‌గా మారింది.
దక్షిణాది చిత్రపరిశ్రమలో ఎంతో ప్రత్యేకంగా భావించే ఫిలింఫేర్‌ అవార్డుల (69th sobha filmfare awards south 2024) కార్యక్రమం శనివారం హైదరాబాద్‌ వేదికగా జరిగింది. ‘దసరా’ చిత్రానికి నాని ఉత్తమ నటుడిగా అవార్డు సొంతం చేసుకున్నారు. ఆనందం వ్యక్తం చేస్తూ అవార్డుతో దిగిన ఓ ఫొటోను ‘ఎక్స్‌’ (ట్విటర్‌)లో షేర్‌ చేశారు. దీనిపై అల్లు అర్జున్‌ స్పందించారు. అభినందనలు తెలుపుతూ.. ”దీనికి నువ్వు పూర్తి అర్హుడివి” అని పేర్కొన్నారు. నాని స్పందిస్తూ.. ”థ్యాంక్యూ బన్నీ. (పుష్ప ది రూల్‌ను ఉద్దేశించి) వచ్చే ఏడాది ‘రూల్’ చేసే వ్యక్తి మరెన్నో అవార్డులను ఇంటికి తీసుకువెళ్తాడని నమ్ముతున్నా” అని రిప్లై ఇచ్చారు. ఈ పోస్ట్‌పై అల్లు అర్జున్‌ తాజాగా స్పందించారు. ”అది నిజమవుతుందని ఆశిస్తున్నా” అని తెలిపారు.
69వ శోభ ఫిల్మ్‌ఫేర్‌ అవార్డ్స్‌ సౌత్‌-2024 (69th sobha filmfare awards south 2024)లో నాని నటించిన ‘దసరా’ చిత్రం దాదాపు 7 విభాగాల్లో అవార్డులు సొంతం చేసుకుంది. ఉత్తమ నటుడు (నాని), ఉత్తమ నటి (కీర్తి సురేష్‌), ఉత్తమ పరిచయ దర్శకుడు (శ్రీకాంత్‌ ఓదెల), ఉత్తమ సినిమాటోగ్రఫీ (సత్యన్‌ సూరన్‌), ఉత్తమ ప్రొడక్షన్‌ డిజైన్‌ (కొల్లా అవినాష్‌), ఉత్తమ కొరియోగ్రఫీ (ప్రేమ్‌ రక్షిత్‌) అవార్డులు అందుకున్నారు. ప్రస్తుతం నాని ‘సరిపోదా శనివారం’ కోసం వర్క్‌ చేస్తున్నారు. మరోవైపు, ‘పుష్ప ది రైజ్‌’తో ఇప్పటికే ఘన విజయాన్ని అందుకున్న అల్లు అర్జున్‌ ప్రస్తుతం ‘పుష్ప ది రూల్’ కోసం పనిచేస్తున్నారు. సుకుమార్‌ దర్శకత్వంలో ఇది తెరకెక్కుతోంది. రష్మిక కథానాయిక. చిత్రీకరణ దశలో ఉంది. డిసెంబర్‌లో విడుదల చేసేందుకు చిత్రబృందం సన్నాహాలు చేస్తోంది.
