రక్తదానంపై అయ్యన్న విద్యాసంస్థల్లో అవగాహన

కె.కోటపాడు,మార్చి10(ఆంధ్రపత్రిక): రక్తదానంచేసే ప్రతీదాత భగవంతునితో సమానమని రక్తదాన చైతన్యకర్త వినోద్ బాలు అన్నారు. ఈనెల12న మండలంలోని ఎ. కోడూరులో ఆనందపురానికి చెందిన అమ్మ చారిటబుల్ ట్రస్ట్ నిర్వహించనున్న “రక్తదాన” శిబిరం నేపథ్యంలో శుక్రవారం అయ్యన్న డిగ్రీ కాలేజీలో రక్తదానంపై విద్యార్థులకు అవగాహనా కార్యక్రమం నిర్వహించారు. అయ్యన్న విద్యా సంస్థల డైరెక్టరు డాక్టరు ఖాసీం అధ్యక్షతన ఎన్.ఎస్.ఎస్. ఆధ్వర్యంలో నిర్వహించిన ఈ అవగాహనా కార్యక్రమంలో బాలు మాట్లాడుతూ రక్తదానం వలన కలిగే ప్రయోజనాలను కాలేజీల విద్యార్థులకు వివరించారు. ట్రస్ట్ చైర్మన్ గొంప వెంకటరావు మాట్లాడుతూ 18 ఏళ్ళు నిండిన ప్రతీవిద్యార్థి ముందుకువచ్చి రక్తదానంచేసి అవసరమైన వారికి ప్రాణదాతగా నిలవాలన్నారు. ఈ కార్యక్రమంలో 60 మంది విద్యార్థినీ, విద్యార్థులు పాల్గొన్నారు. ఎన్.ఎస్.ఎస్. పీఓలు గాడి అప్పారావు (జూనియర్ కాలేజ్), సీముసురు రమణ(డిగ్రీ కాలేజ్) సిబ్బంది పాల్గొన్నారు.