ఘనంగా తణుకు వారి సత్తెమ్మ తల్లి సంబరం

బిక్కవోలు, ఫిబ్రవరి 5 (ఆంధ్రపత్రిక) : తూర్పుగోదావరి జిల్లా బిక్కవోలు మండలం బిక్కవోలు గ్రామంలో కోరిన కోర్కెలు తీర్చే అమ్మవారిగా పేరొందిన తణుకు వారి సత్తెమ్మ తల్లి సంబరం ఘనంగా నిర్వహించారు.రెండేళ్లకోసారి జరిగే ఈ ఉత్సవాలను తణుకు వంశస్థులు మూడు రోజుల పాటు అత్యంత భక్తిశ్రద్ధలతో నిర్వహిస్తారు. మొదటి రోజు పంబ నాదపు కళాకారులు అమ్మవారి చరిత్రను వివరించగా రెండోరోజు ఘట రూపంలో ఉన్న అమ్మవారి రూపాన్ని బిక్కవోలు సహా పరిసర గ్రామాల నుండి అధిక సంఖ్యలో భక్తులు దర్శించి నైవేద్యాలు సమర్పించుకుని తమ మొక్కులు తీర్చుకున్నారు. ఈ సందర్బంగా తీన్‌ మార్‌ వాయిద్యాలు, డప్పు డ్యాన్సుల, బ్యాండు మేళాల మధ్య జరిగిన ఉత్సవంలో అమ్మవారి వేషధారి ఇచ్చిన బియ్యాన్ని వండుకుని తిన్న సంతానం లేని దంపతులకు సంతానప్రాప్తి కలుగుతుందని ప్రగాఢ నమ్మకం. అలాగే మూడో రోజు తమ కోర్కెల ఫల సిద్ధికై అమ్మ వారి ప్రతిష్టా స్థానంలో ఇంతక్రితం పాతిపెట్టిన నాణాలను భక్తులు చేజిక్కించుకుని మరలా కొత్తగా నాణాలను పాతడం ఆనవాయితీగా వస్తోంది. కాగా అమ్మవారి దర్శనానికి మూడురోజులూ విచ్చేసిన భక్తులకు ఉత్సవ కమిటీ అధ్యక్షుడు తణుకు సూరిబాబు ఇతర కమిటీ సభ్యుల ఆధ్వర్యంలో భారీ అన్న సమారాధన నిర్వహించారు.